Debati për menaxhimin e plazheve publike në Pogradec është rikthyer sërish këtë sezon turistik, pas denoncimit të bërë nga një operator privat që kundërshton dhënien e hapësirave publike për subjekte të tjera private.
Dritan Hoxha, administrator i një biznesi në bregun e liqenit, pretendon se një pjesë e plazhit publik po reduktohet në favor të operatorëve privatë. Sipas tij, në zonën ku prej vitesh funksionon një fushë volejbolli për të rinjtë, janë planifikuar aktivitete private, ndërsa qytetarëve po u kufizohet aksesi në hapësirat publike.
Hoxha deklaron se ka denoncuar pranë institucioneve përgjegjëse dhënien e tre lejeve për beach bare, të cilat sipas tij bien ndesh me legjislacionin në fuqi dhe cenojnë interesin publik.
Nga ana tjetër, Bashkia e Pogradecit i hedh poshtë këto akuza. Drejtoria e Tatim-Taksave sqaron se në zonën më të frekuentuar të plazhit vijojnë të ekzistojnë disa hapësira publike të dedikuara për pushuesit dhe se deri më tani nuk është miratuar asnjë leje për beach bar.
Sipas bashkisë, autorizimet për struktura të tilla nuk jepen më nga pushteti vendor, por nga institucionet qendrore përgjegjëse për administrimin e vijës bregliqenore. Autoritetet lokale theksojnë se plazhi publik nuk është prekur dhe se shpërndarja e hapësirave është bërë sipas procedurave ligjore.
Ndërkohë, Bashkia e Pogradecit ka vënë në dispozicion edhe këtë vit një plazh publik të përshtatur për personat me aftësi të kufizuara. Megjithatë, diskutimet mbi balancën mes interesit publik dhe zhvillimit të aktiviteteve private në vijën bregliqenore mbeten një çështje e hapur në qytetin turistik.
