Bllokimi i aksit rrugor Pogradec–Librazhd ka sjellë reagimin e qytetarëve korçarë, të cilët ditën e sotme kanë zhvilluar një protestë paqësore përpara ambienteve të Bashkia Korçë, duke kërkuar vëmendje lokale dhe kombëtare ndaj problematikave të juglindjes së vendit.
Protestuesit kanë dorëzuar një letër të hapur të firmosur prej tyre, ku parashtrojnë disa kërkesa konkrete. Ndër më kryesoret janë mbështetja ekonomike për bizneset e prekura nga bllokimi i rrugës, si dhe hartimi i një strategjie më efikase në bashkëpunim me operatorët turistikë të zonës, për të zbutur ndikimin negativ në sektorin e turizmit.
Sipas qytetarëve, numri i ulët i pjesëmarrësve në protestë lidhet me humbjen e shpresës dhe mungesën e besimit se reagimet do të sjellin ndryshim të menjëhershëm.
Gjatë ditëve të fundit, në juglindje të vendit janë shënuar reagime të vazhdueshme nga operatorë turistikë dhe përfaqësues të shoqërisë civile, të cilët kërkojnë zgjidhje sa më të shpejtë për situatën e krijuar dhe një plan konkret për mbështetjen e zonës.
