Mbi 600 hektarë tokë bujqësore në fushën e Maliqit u përmbytën gjatë dimrit të kaluar, duke rikthyer në vëmendje problematikat e sistemit të kullimit. Për zgjidhjen e situatës, shihet si i domosdoshëm ribonifikimi i fushës, veçanërisht në zonën torfike, ku niveli i tokës ka rënë ndër vite.
Drejtori i Bujqësisë në Bashkinë Maliq, Aurel Zenunllari, bën me dije se Ministria e Bujqësisë ka siguruar financimin për realizimin e këtij investimi, i cili pritet të ndikojë në parandalimin e përmbytjeve dhe përmirësimin e sistemit të ujitjes.
Ndërsa eksperti i bujqësisë, Ylver Bylykbashi, thekson se ndërhyrja duhet të përfshijë pastrimin e kanaleve kulluese dhe të shtratit të lumit Devoll. Sipas tij, në zonat ku niveli i tokës ka rënë nën nivelin e lumit, nevojitet edhe ndërtimi i një hidrovori për largimin e ujërave.
Fusha e Maliqit shtrihet në rreth 13 mijë hektarë, prej të cilave 6 mijë hektarë janë zonë torfike. Rreth 500 hektarë nga sipërfaqja e përmbytur dimrin e kaluar ndodheshin në këtë zonë.
Ribonifikimi dhe përmirësimi i infrastrukturës së kullimit konsiderohen të rëndësishëm për mbrojtjen e tokave bujqësore, shmangien e dëmeve nga përmbytjet dhe garantimin e kushteve më të mira për fermerët e juglindjes.
