Në San Demetrio Koronë të Kalabrisë, vendlindjen e ideologut të madh të Rilindjes Kombëtare shqiptare, Jeronim De Rada, u inaugurua teatri i parë arbëresh me një kapacitet prej 500 vendesh, në kuadër të aktivitetit madhor “Konventa Arbërore”.
Ceremonia u kthye në një festë të madhe të kulturës dhe identitetit shqiptar, duke bashkuar arbëreshë dhe shqiptarë nga Shqipëria, Kosova, Maqedonia e Veriut dhe Mali i Zi, në një ngjarje simbolike për ruajtjen dhe promovimin e trashëgimisë kombëtare.
Mes të ftuarve ishte edhe CEO i SIGAL INSURANCE GROUP, Avni Ponari, i cili përfaqësoi kompaninë lider të sigurimeve në rajon dhe rikonfirmoi mbështetjen e saj për kulturën shqiptare dhe arbëreshe.
SIGAL kontribuoi në këtë event historik përmes Orkestrës së Harqeve SIGAL, me 15 instrumentistë nën dirigjimin e Mjeshtrit të Madh Ermir Dizdari, të cilët sollën në skenën e teatrit të ri një spektakël të pasur artistik me muzikë shqiptare, arbëreshe, valle tradicionale dhe emocione të forta që zgjatën për më shumë se tre orë.
Ky aktivitet shënoi një tjetër sukses për Orkestrën e Harqeve SIGAL, e cila prej vitit 2013 promovon artin shqiptar në Shqipëri, Kosovë dhe rajon, ndërsa tashmë shton në historikun e saj edhe një skenë të rëndësishme ndërkombëtare, teatrin më të ri arbëresh në Kalabri.
Kryetari i Komunës së San Demetrio Koronës, Ernesto Madeo, vlerësoi kontributin e artistëve dhe të Avni Ponarit, duke e cilësuar këtë bashkëpunim si një urë të fortë lidhëse mes botës arbëreshe dhe shqiptare.
Teatri i ri arbëresh pritet të shndërrohet në një qendër të rëndësishme arti, kulture dhe edukimi, duke forcuar më tej identitetin e një komuniteti që prej më shumë se pesë shekujsh ka ruajtur gjuhën, traditat dhe shpirtin shqiptar në zemër të Europës.
