Për herë të parë, Bishnica, një nga fshatrat më të piktoreskë të Mokrës, organizoi Festën e fshatit, një aktivitet që mblodhi banorët që sot jetojnë në qytete të ndryshme të Shqipërisë apo në Europë dhe Shtetet e Bashkuara të Amerikës. Pas shumë vitesh, oborret dhe rrugët dhe qendra e fshatit u mbushën sërish me njerëz, duke e kthyer këtë ditë në një festë të madhe kujtimesh.
Edicioni i parë i festës u shoqërua me ekspozitë fotografike që risolli historinë e Bishnicës, sharrtarëve, inxhinerëve, këngëve e valleve popullore, si edhe gatimet karakteristike të zonës.
Aktiviteti kishte për qëllim jo vetëm bashkimin e komunitetit, por edhe promovimin e vlerave kulturore, historike dhe turistike të fshatit.
E njohur si “e bukura e Mokrës”, Bishnica ofron natyrë të paprekur, pyje, ajër të pastër dhe një sërë destinacionesh që tërheqin vizitorë vendas e të huaj.
Dikur, Bishnica ishte ndër fshatrat më të populluara të krahinës. Stabilimenti i sharrave dhe përpunimit të lëndës drusore siguronte punësim për dhjetëra familje dhe ishte shtylla kryesore e ekonomisë së zonës. Pas mbylljes së tij, shumë banorë u detyruan të emigronin, ndërsa sot në fshat kanë mbetur vetëm pak familje që jetojnë kryesisht me blegtori dhe bujqësi.
Banorët thonë se, pavarësisht viteve larg vendlindjes, organizimi i këtij edicioni të parë është një hap i rëndësishëm për të ruajtur traditat dhe për të forcuar lidhjen me vendin ku kanë rrënjët.
Festa e Bishnicës synon të kthehet në një traditë të përvitshme, duke promovuar potencialin turistik e kulturor të kësaj zone.
