Ka nisur në Pogradec edicioni i dytë i Festivalit Ndërkombëtar të Akuarelit “Lin Aqua”, një ngjarje artistike që ka bërë bashkë mbi 50 piktorë nga vende të ndryshme të botës.
Për disa ditë me radhë, artistët do të sjellin në telajo, përmes teknikës së akuarelit, peizazhet më të bukura të Linit dhe Pogradecit, duke promovuar natyrën, kulturën dhe trashëgiminë e zonës përmes artit.
Pjesëmarrësit shprehen të mahnitur nga bukuritë e Shqipërisë. Një piktor nga Italia, që viziton vendin tonë për herë të parë, e cilëson Shqipërinë si një vend ideal për të pikturuar.
“Është hera ime e parë këtu. Nuk kisha dëgjuar shumë për Shqipërinë, por më duket një vend perfekt. Sot po pikturoj ujin, banesat dhe natyrën. Ngjyrat janë të mrekullueshme dhe frymëzuese,” u shpreh ai.
Një artiste tjetër, e cila ndodhet për herë të dytë në Shqipëri dhe për herë të parë në Pogradec, tha se natyra shqiptare ka ruajtur autenticitetin e saj.
“Shqipëria është më shumë se e bukur, sepse natyra është ende natyrë. Ka dritë, ngjyra dhe jetë kudo,” tha ajo.
Edhe një piktor shqiptar që jeton në Itali u shpreh se rikthimi në vendlindje për të pikturuar është gjithmonë një emocion i veçantë.
“Shqipëria është një vepër arti. Ka ngjyra të forta, elegante dhe çdo cep i saj ka një histori për të treguar,” tha ai.
Një nga organizatorët e festivalit, Armand Xhika, vlerësoi nivelin e lartë të artistëve pjesëmarrës dhe entuziazmin e tyre për Pogradecin.
“Artistët që marrin pjesë këtu janë të një niveli shumë të lartë. Të gjithëve u ka pëlqyer Pogradeci. Uji është elementi kryesor i këtij festivali dhe lidhet natyrshëm me teknikën e akuarelit. Shumica nuk kishin qenë më parë në Shqipëri dhe janë mahnitur nga bukuria e saj. Kemi pjesëmarrës nga Ukraina, Lituania, Spanja, Italia dhe vende të tjera,” tha ai.
Ekspozita me punimet e realizuara gjatë festivalit do të qëndrojë e hapur deri më 12 korrik, duke u dhënë mundësi qytetarëve dhe turistëve të vizitojnë dhe të shijojnë veprat e artistëve ndërkombëtarë.
