Dy vite pas ndarjes nga jeta të poetit lirik korçar Skënder Rusi, lexuesit kanë mundësinë të njihen me krijimet e tij të fundit përmes librit “Kthema Ajrin”, një vëllim dygjuhësh në shqip dhe rumanisht që sjell poezi të pabotuara më parë.
Botimi i ri rikthen në vëmendje një nga zërat më të rëndësishëm të poezisë shqipe, i cili gjatë gjithë krijimtarisë së tij i kushtoi vargje Korçës, dashurisë, jetës dhe dhimbjes njerëzore.
Në ceremoninë promovuese, djali i poetit, Eris Rusi, u shpreh se ky përvjetor nuk duhet parë si një ditë dhimbjeje, por si një festë e poezisë, pasi Skënder Rusi rikthehet te lexuesit përmes veprës së tij të fundit.
Edhe aktorja Zamira Kita vlerësoi figurën e poetit, duke theksuar se krijimtaria e tij vazhdon të jetë pjesë e pandashme e jetës artistike dhe netëve poetike të Korçës. Sipas saj, poezitë e Rusit mbajnë gjallë dashurinë për atdheun, natyrën dhe familjen, duke e bërë autorin gjithmonë të pranishëm mes lexuesve.
Libri “Kthema Ajrin” përmbledh poezitë e fundit të Skënder Rusit, poetit të vlerësuar me dhjetëra çmime kombëtare dhe ndërkombëtare, i konsideruar si një ndër emrat më të spikatur të poezisë shqiptare dhe ballkanike.
