Për herë të parë, Filarmonia e Kosovës është ngjitur në skenën e Teatrit “Andon Zako Çajupi” në Korçë, duke sjellë një koncert të veçantë që ndërthurte muzikën klasike shqiptare dhe atë botërore në qytetin e serenatave.
Nën dirigjimin e maestro Baki Jashari, orkestra interpretoi një repertor të pasur artistik, ku një vend të rëndësishëm zunë edhe veprat e kompozitorëve shqiptarë, të cilat u pritën me entuziazëm dhe duartrokitje nga publiku korçar.
Kulmi emocional i mbrëmjes ishte interpretimi surprizë i një serenate korçare nga e gjithë orkestra, duke krijuar një atmosferë të veçantë në sallën e teatrit. Dirigjenti Baki Jashari e cilësoi këtë performancë si një dhuratë simbolike për Korçën, qytetin e kulturës dhe traditës artistike.
“Vijmë për herë të parë në Korçë dhe ishte një emocion i veçantë. Korça njihet si qytet kulturor me publik të mrekullueshëm. Menduan se çfarë do t’i pëlqente më shumë këtij qyteti dhe zgjodhëm serenatën korçare, të cilës u dhamë madhështinë e një orkestre të madhe”, u shpreh Jashari.
Edhe violinistja e njohur dhe solistja Sihana Badivuku vlerësoi ngrohtësinë dhe kulturën artistike të publikut korçar, duke e cilësuar koncertin si një përjetim të rrallë emocional.
E themeluar në vitin 2000, pas luftës në Kosovë, Filarmonia e Kosovës është kthyer në një nga institucionet më të rëndësishme të muzikës klasike shqiptare në rajon, duke përfaqësuar kulturën shqiptare në skena prestigjioze europiane si Vatikani, Parisi, Roma dhe Berna. Koncerti në Korçë shënoi një tjetër urë bashkëpunimi kulturor mes artistëve shqiptarë dhe publikut artdashës.
