Babai i një vajze të mitur ka denoncuar në polici mjekun Niko Nunka, duke e akuzuar për ngacmim seksual gjatë trajtimit të saj në spitalin e Korçës.
Sipas dëshmisë së babait, familja kishte ardhur nga Gjermania për pushime, ndërsa vajza prej dy javësh kishte shfaqur probleme me stomakun dhe të vjella. Fillimisht ajo ishte trajtuar me ilaçe të marra në farmaci, por pa përmirësim. Më pas familjarët e kishin dërguar në spital, ku pas analizave mjekët konstatuan se vajza vuante nga apandesiti dhe duhej t’i nënshtrohej një operacioni urgjent.
Pas ndërhyrjes kirurgjikale, familjes iu tha se vajza kishte një infeksion dhe se duhej të trajtohej me kremra mjekësorë. Babai pretendon se doktori e merrte vazhdimisht vajzën në dhomë për ta mjekuar, ndërsa familjarëve u kërkonte të largoheshin.
“Ne nuk dyshuam, sepse ishte doktor në moshë dhe kishim besim tek ai”, është shprehur babai në dëshminë e tij.
Sipas tij, pas katër ditësh vajza i ka treguar familjes se doktori kishte kryer veprime të papërshtatshme ndaj saj dhe kishte tentuar ta puthte. Në atë moment familjarët kanë njoftuar policinë.
Babai deklaron se e ka ndaluar mjekun teksa po largohej me ambulancë, deri në mbërritjen e policisë. Më pas familjarët janë marrë në pyetje nga autoritetet.
“Dua drejtësi për vajzën time. Nuk e fal”, ka deklaruar ai.
Ndërkohë, pritet reagimi zyrtar i policisë dhe institucioneve shëndetësore lidhur me rastin.
