https://www.swisstransfer.com/d/574996bb-9e2a-4629-8085-a0d597abe032
Pas një pritjeje të gjatë, ka nisur zyrtarisht hedhja e themeleve për një projekt të shumëpritur, ndërtimin e Muzeut të Dritëro Agollit, një vepër që i bën nder jo vetëm letërsisë shqipe, por edhe gjithë trevës së Devollit.
Ky muze, i cili do të jetë një nga pikat më të rëndësishme të turizmit kulturor në Qarkun Korçë, do të përfaqësojë denjësisht jetën, veprën dhe trashëgiminë e një prej figurave më të mëdha të letërsisë shqiptare dhe një devolliu të shquar që e lartësoi emrin e vendlindjes së tij brenda dhe jashtë Shqipërisë.
I iniciuar fillimisht në fillim të viteve 2000, ky projekt mbeti për shumë vite në pritje. Por vetëm një vit më parë nisi të marrë jetë konkretisht, falë vullnetit dhe angazhimit të komunitetit dhe institucioneve vendore. Ai është konceptuar si një projekt i devollinjve, për devollinjtë, e kërkuar nga komuniteti, projektuar nga profesionistët e zonës dhe zbatuar nga kompani vendase.
Të dhëna teknike të projektit:
• Vlera e kontratës (pa TVSH): 15,846,318.50 lekë
• Vlera e kontratës (me TVSH): 19,015,582.20 lekë
• Afati i realizimit: 6 (gjashtë) muaj, i përllogaritur nga momenti i dorëzimit të sheshit të ndërtimit dhe sipas procesverbalit përkatës.
Ky projekt përfaqëson një nga emblemat më të spikatura të trashëgimisë sonë kulturore dhe është një hap i rëndësishëm drejt zhvillimit të mëtejshëm të turizmit kulturor në Bashkinë Devoll dhe më gjerë në Qarkun Korçë.
