Për të tretin vit radhazi, teatri “Andon Zako Çajupi” në Korçë u kthye në skenën e festivalit të koreve të miqësisë Greko-Shqiptare, një aktivitet që po forcon çdo vit lidhjet kulturore mes dy vendeve përmes muzikës.
Në këtë edicion morën pjesë grupe korale nga Athina, Evia dhe Kalamata, ndërsa Shqipëria u përfaqësua nga kori i njohur “Lira” dhe një grup koral i një shkolle të qytetit juglindor.
Artistët pjesëmarrës theksuan ngjashmëritë mes serenatës korçare dhe muzikës greke, duke nënvizuar se traditat muzikore të dy popujve kanë ndikuar dhe pasuruar njëra-tjetrën ndër vite. Sipas tyre, muzika ballkanike ka një shpirt të përbashkët, ndërsa serenatat shqiptare e greke mbeten “motra” që lidhin kulturat përtej gjuhës.
Për drejtuesit e koreve greke, festivale të tilla dëshmojnë se historia dhe miqësia mes popujve mund të ndërtohen edhe përmes artit, ndërsa gjuha e muzikës mbetet universale.
Mbrëmja artistike u ndoq nga artdashës të shumtë shqiptarë dhe grekë, të ardhur enkas në Korçë, duke e kthyer festivalin në një festë të përbashkët kulture, tradite dhe harmonie ballkanike.
