Korçë – Policia e Korçës ka goditur dy raste të veprave penale të vjedhjes, ndërsa po heton edhe një konflikt fizik të ndodhur mëngjesin e sotëm në qytet, ku mbeti i plagosur një i mitur.
Specialistët për Hetimin e Krimeve arrestuan në flagrancë shtetasin F. S., 42 vjeç, banues në Korçë, pasi dyshohet se në lagjen nr. 7 ka vjedhur një biçikletë në pronësi të një 41-vjeçari. Sipas policisë, biçikleta e vjedhur u gjet dhe u sekuestrua si provë materiale.
Po ashtu, materialet iu referuan Prokurorisë për nisjen e procedimit penal ndaj shtetasit B. I., 18 vjeç, banues në Korçë, i cili dyshohet se ka tentuar të vjedhë në një banesë të pabanuar në lagjen nr. 3, në pronësi të një 65-vjeçari.
Ndërkohë, mëngjesin e sotëm në lagjen nr. 2 të Korçës është regjistruar një konflikt fizik mes disa shtetasve. Si pasojë e përplasjes, një 17-vjeçar ka mbetur i plagosur me mjet prerës dhe ndodhet në spital, jashtë rrezikut për jetën.
Policia bën me dije se një person është shoqëruar në Komisariat, ndërsa grupi hetimor vijon punën për zbardhjen e plotë të rrethanave të ngjarjes.
