Shuhet nga jeta farmacistja e Maliqit, Dr.Lavdije Gora
Figurë e respektuar e komunitetit, me dekada shërbim ndaj qytetarëve
Me dhimbje të thellë komuniteti i Maliqit dhe i Korçës ka marrë lajmin për ndarjen nga jeta të farmacistes së nderuar, Dr. Lavdije Gora (Fejzullai), një emër i njohur dhe shumë i respektuar në fushën e shëndetësisë në zonë.
Dr. Lavdija lindi në Dushar, Korçë, më 1 janar 1953. Ajo përfundoi studimet e larta për farmaci në Universitetin e Tiranës në vitin 1976, duke i kushtuar gjithë jetën profesionit dhe shërbimit ndaj komunitetit.
Për vite me radhë, Dr. Lavdija ushtronte profesionin e farmacistes në farmacinë e saj në qytetin e Maliqit, ku u bë një figurë e dashur për të gjithë. Qytetarët do ta kujtojnë për buzëqeshjen e ngrohtë, këshillën profesionale, humanizmin dhe përkushtimin e saj të pandarë në çdo ditë të punës.
Ndarja nga jeta e Dr. Lavdijes është një humbje e rëndë për familjarët, kolegët, miqtë dhe gjithë komunitetin e Maliqit, të cilët e kanë vlerësuar gjithmonë si profesioniste të shkëlqyer dhe njeri të mirë.
Ngushëllimet më të sinqerta i shkojnë bashkëshortit Dr. Kujtimit, vajzës dhe koleges në profesion Dr. Aldës, djalit Saimirit, të afërmve, miqve dhe të gjithë të dashurve të saj.
Qoftë i paharruar kujtimi i saj!
