Në skenën e Teatrit “Andon Zako Çajupi” u shfaq dje premiera e dramës “Përtej Horizontit” të Eugene O’Neill, një nga veprat më të ndjera të dramaturgjisë botërore, e sjellë me mjeshtëri nga regjisori Silvio Goskova. Vepra ngjalli emocione të forta tek publiku, duke reflektuar mbi ëndrrat, dashurinë, fatin dhe kufijtë e zgjedhjeve njerëzore. Regjisori Goskova u shpreh se kjo dramë është një udhëtim i brendshëm që prek çdo njeri, sepse flet për atë që humbasim teksa ndjekim ëndrrat tona. Është një thirrje për të parë përtej vetes, përtej horizontit të zakonshëm.
Emocionet pas shfaqjes kanë ndarë edhe disa nga aktorët e kësaj shfaqjeje të cilët kanë vlerësuar bashkëpunimin me regjisorin Goskova dhe pritjen e publikut korçar.
“Përtej Horizontit” do të vijojë të shfaqet në datat 1 dhe 2 nëntor, duke ftuar publikun të përjetojë një vepër të rrallë mbi natyrën njerëzore dhe fatin që s’mund të shmanget.
