Shkrimtari, skenaristi dhe diplomati Ylljet Aliçka është shpallur “Qytetar Nderi” i Kolonjës, në një ceremoni të zhvilluar në Ersekë.
Aliçka u vlerësua për kontributin e tij në letërsi, art dhe jetën publike, ndërsa për të, kjo mirënjohje ka një domethënie të veçantë për shkak të lidhjeve familjare me Kolonjën.
“Jam vërtet i kënaqur, por edhe i emocionuar. Është një ndjenjë që të prek edhe në anën emocionale të zemrës, ta shohësh që je i yni, i Kolonjës, pavarësisht se jetojmë larg Kolonjës”, u shpreh Aliçka.
Ai tregoi se lidhja me Kolonjën vjen nga gjyshërit e tij, të lindur dhe rritur në këtë trevë, dhe se historitë e saj kanë qenë prej kohësh pjesë e kujtesës dhe frymëzimit të tij.
Profesor doktor Ilo Mele vlerësoi kontributin e Aliçkës jo vetëm në krijimtarinë artistike dhe letrare, por edhe në veprimtarinë e tij diplomatike.
Sipas tij, përvoja dhe njohuritë e thella të Aliçkës në art dhe letërsi kanë qenë një bazë e rëndësishme edhe në angazhimin e tij publik e diplomatik.
Me titullin “Qytetar Nderi”, Kolonja i shton emrit të Ylljet Aliçkës një vend në historinë e saj kulturore. Ndërkohë, shkrimtari ka paralajmëruar se lidhjen me vendin e të parëve do ta sjellë edhe në letërsi, përmes një vepre kushtuar historive dhe njerëzve të Kolonjës.
