Ndahet nga jeta Gjeneral Major Adem Dino
Me hidhërim të thellë është njoftuar ndarja nga jeta e Gjeneral Majorit në lirim dhe ish-deputetit të Kuvendit Popullor në tre legjislatura, Adem Dino.
Adem Dino lindi më 25 qershor 1945 në fshatin Panarit të Korçës, në një familje me tradita të forta atdhetare. I ati, Isuf Dino, ka qenë partizan në radhët e Luftës Nacionalçlirimtare.
Pas përfundimit me rezultate të shkëlqyera të shkollës së mesme ushtarake “Skënderbej” dhe më pas të Shkollës së Bashkuar të Oficerëve, me specialitet gjitharmësh, ai nisi një karrierë të gjatë e të suksesshme në Forcat e Armatosura.
Gjatë viteve të shërbimit, ai ka mbajtur një sërë detyrash të rëndësishme — nga komandant toge, kompanie e batalioni, deri në postin e Komandantit të Brigadës.
Në vitin 1982, Adem Dino u emërua Drejtor i Drejtorisë Operative dhe Zëvendësshef i Shtabit të Përgjithshëm në Ministrinë e Mbrojtjes.
Në çdo detyrë, ai u dallua për thjeshtësi, drejtësi dhe afërsi me njerëzit, duke mbetur një figurë e respektuar si në radhët e ushtrisë ashtu edhe në jetën civile.
Familjarëve, të afërmve dhe gjithë miqve të tij, u shprehen ngushëllimet më të sinqerta.
I përjetshëm qoftë kujtimi i Gjeneral Major Adem Dinos.
