Pogradeci mirëpret “Festën e Koranit” më 21 gusht
Pogradeci do të jetë qendra e festës dhe e traditës më 21 gusht, ku qyteti liqenor do të mirëpresë “Festën e Koranit”, një ngjarje që i kushtohet produktit unik e të rrallë që natyra i ka dhuruar këtij vendi. Korani, simbol i Pogradecit dhe pasuri kombëtare, do të jetë protagonist i aktiviteteve gjatë gjithë ditës.
Festa nis në mëngjes me hedhjen e rasatit të Koranit në liqen, një akt simbolik për mbrojtjen dhe trashëgiminë e kësaj specieje të rrallë. Më pas, vizitorët do të kenë mundësinë të ndalen në një ekspozitë me materiale të vjetra të peshkimit, duke udhëtuar në historinë e kësaj tradite shekullore.
Një tjetër pikë kulmore e festës do të jenë gatimet tradicionale me koran. Bujtinat dhe restorantet më të mira të qytetit do të prezantojnë recetat e tyre, të cilat do të vlerësohen nga një juri profesioniste me çmime dhe trofe për gatimin më të mirë.
Atmosfera festive do të kulmojë në mbrëmje me një koncert madhështor ku do të ngjiten në skenë artistë të njohur si David Dreshaj, Ardit Çuni dhe Marsela Çibukaj, të cilët do të sjellin muzikë dhe argëtim për qytetarët dhe vizitorët.
“Festa e Koranit” është më shumë sesa një aktivitet kulturor e kulinar. Ajo është një homazh për një pasuri të natyrës, një aset të Pogradecit dhe një thirrje për të ruajtur e promovuar atë.
