Pogradeci e ka shpallur objektivin e sezonit të ri që ditën e parë të përgatitjeve: ngjitjen në elitën e futbollit shqiptar në përfundim të edicionit 2025-2026. Paraqitja në pjesën e dytë të sezonit të kaluar do të shërbejë si një eksperiencë e vlefshme dhe si udhërrëfyes për rrugëtimin që liqenorët synojnë të përmbyllin me sukses.
Për të realizuar këtë mision ambicioz, klubi ka nisur një merkato të kujdesshme, me synimin për të përforcuar të gjitha repartet me lojtarë cilësorë dhe me përvojë ndërkombëtare.
Zyrtarisht, janë prezantuar dy afrime të reja:
Uillian Henrique dos Santos, një mesfushor brazilian 26-vjeçar, i cili pritet të sjellë qetësi, vizion dhe eksperiencë në ndërtimin e lojës në mesin e fushës;
Santiago Alfonso Rodriguez Pacheco, sulmues 20-vjeçar nga Venezuela, që shihet si një element premtues për ofensivën pogradecare.
Të dy futbollistët pritet t’i shtojnë jo vetëm cilësi teknike skuadrës, por edhe një dimension tjetër në aspektin taktik dhe fizik.
Merkatoja nuk përfundon me kaq, pasi drejtuesit kanë paralajmëruar lëvizje të tjera në ditët në vijim, duke qenë se Pogradeci kërkon të ndërtojë një skuadër të denjë për Superioren.
