Serenata korçare rikthehet aty ku mori jetë, në rrugicat dhe sokakët e qytetit. Edicioni i tretë i Festivalit të Serenatave do të zhvillohet këtë vit përgjatë katër netëve, në katër ambiente të ndryshme, duke bashkuar brezat që e kanë kënduar ndër vite me të rinjtë që po e trashëgojnë këtë traditë.
Për brezat e vjetër, serenata ishte shumë më tepër se një këngë. Ajo ishte pjesë e jetës së përditshme dhe e mbrëmjeve korçare, kur grupet e djemve lëviznin nëpër lagje me pak instrumente dhe këndonin pranë ballkoneve të shtëpive.
Enver Goreni kujton se serenata e dikurshme kishte një tjetër mënyrë interpretimi.
“Këndohej me një kitarë akustike, nëpër lagje të ndryshme. Ngjiteshin grupe djemsh, këndonin nëpër rrugica dhe përballë ballkoneve të shtëpive.”
Edhe Pandi Tasellari sjell kujtime nga netët kur serenata shoqëronte rrugët e Korçës.
“Serenatën e këndonim me dy-tre kitara, dilnim sokakëve duke kënduar. Nga Çezmat e Reja, Shëndellia, të gjitha rrugët i kemi gjesdisur.”
Tradita, ndërkohë, vijon të përcillet edhe tek brezat e rinj. Erika Ahmeti, e cila merr pjesë për të tretin vit radhazi në festival, tregon se është rritur me serenatat korçare.
“Unë kam mësuar që e vogël të këndoj serenatën. Jam rritur me serenatat korçare dhe është kënaqësi të marr pjesë për vitin e tretë radhazi.”
Ndërsa Stelios Tollkuçi, vetëm 18 vjeç, tregon se serenatën e këndon që prej moshës 12-vjeçare.
“Është një trashëgimi e veçantë për brezat e rinj. Serenatat janë pjesë e historisë ku jam rritur dhe më kanë mbetur në zemër.”
Sipas Blerta Belliut, edicioni i tretë i festivalit do të sjellë një koncept ndryshe, duke e rikthyer serenatën në rrugicat ku ajo mori jetë.
“Në vend që të kemi ditë, kemi menduar që serenatën ta kthejmë aty ku ka nisur, në rrugicat e Korçës. E kemi filluar këtë përqafim me të rinjtë dhe do ta mbyllim natën e fundit me më të vjetrit.”
Katër netët e festivalit do të bashkojnë kështu zërat e brezave të ndryshëm, duke sjellë në rrugicat e Korçës një traditë që vijon të mbetet pjesë e identitetit kulturor të qytetit.
Nga serenatat e dikurshme nën ballkone, tek zërat e të rinjve të sotëm, Korça vazhdon ta mbajë gjallë këtë traditë brez pas brezi.
