Një ambient i posaçëm për takimet e fëmijëve me prindërit e divorcuar është inauguruar pranë Zyrës Përmbarimore në Pogradec.
Hapësira e re synon të krijojë një mjedis më të sigurt dhe më të përshtatshëm për fëmijët gjatë zbatimit të vendimeve gjyqësore që lidhen me takimet me prindërit.
Në ceremoninë e inaugurimit morën pjesë Zëvendësministrja e Drejtësisë, Elona Hoxha, Drejtori i Përgjithshëm i Shërbimit Përmbarimor, Ergys Qirici, si dhe përfaqësues të institucioneve.
Zëvendësministrja Hoxha theksoi se interesi më i lartë i fëmijës duhet të jetë në qendër të punës së institucioneve të drejtësisë. Sipas saj, ambienti i ri është një hap drejt krijimit të një qasjeje më njerëzore dhe më të ndjeshme ndaj nevojave të fëmijëve.
Ndërsa Drejtori i Përgjithshëm i Shërbimit Përmbarimor, Ergys Qirici, u shpreh se vendimet gjyqësore që lidhen me familjet përfshijnë jo vetëm takimet me fëmijët, por edhe detyrimet ushqimore dhe çështje të tjera familjare.
Ambientet e reja do të përdoren për zbatimin e vendimeve gjyqësore që lidhen me takimet e fëmijëve me prindërit, duke synuar që ky proces të zhvillohet në kushte më të përshtatshme dhe miqësore për fëmijët.
