Pogradeci është kthyer në një pikë takimi për artistë nga vende të ndryshme të botës, përmes Kolonisë Ndërkombëtare të Piktorëve, një aktivitet me traditë që zhvillohet që prej viteve 2000.
Këtë vit, rreth 20 piktorë nga më shumë se 10 vende, mes tyre Kosova, Serbia, Ukraina, Rusia, Meksika, Spanja, Franca dhe vende të tjera të Ballkanit, janë bërë pjesë e kolonisë.
Organizatori Sajmir Ahmeti e cilëson Pogradecin një muzë për artistët dhe aktivitetin një mundësi për të krijuar ura komunikimi mes kulturave të ndryshme.
“Është krijimi i urave, i marrëdhënieve dhe i komunikimit mes njerëzve e kulturave. Këtu kemi artistë nga vende të Ballkanit, mes të cilave politika ndoshta nuk e ka gjetur gjithmonë gjuhën e përbashkët. Por artistët e kanë gjetur atë gjuhë. Ata e kanë krijuar dhe e kanë nisur këtë komunikim”, shprehet Ahmeti.
Edhe piktorja nga Kosova, Dhurata Begolli, thekson se arti i afron njerëzit pavarësisht vendeve nga vijnë.
“Ne të gjithë jemi artistë dhe, pavarësisht se nga cili vend vijmë, ajo që ka rëndësi është që të kemi një bisedë të mirë, një energji të mirë dhe ta përcjellim te njëri-tjetri.”
Natyra e Pogradecit, liqeni dhe mikpritja shqiptare janë kthyer në frymëzim për artistët, ndërsa për disa prej tyre kjo është vizita e parë në Shqipëri.
Piktorja ruse Ekaterina Romanova shprehet se është impresionuar nga mikpritja shqiptare, ndërsa artistja Ana Kostenko, e cila ka lindur në Ukrainë dhe jeton në Poloni, tregon se Shqipëria ka tejkaluar pritshmëritë e saj.
Kolonia përcjell një mesazh të përbashkët: arti nuk njeh kufij dhe mund të krijojë ura komunikimi edhe aty ku politika nuk ka mundur.
