Nga informacionet e përditësuara të marrë nga MZSH-Kolonjë dhe struktura rajonale e Agjencisë së Zonave të Mbrojtura, zjarri i rënë pasditen e 11 gushtit në drejtim të Parkut Natyror të Gërmenjës, në territorin e bashkisë Kolonjë, vijon të jetë aktiv, por pa përhapje të re krahasuar me mbrëmjen e kaluar. Megjithatë, era e fortë e mban situatën me risk të lartë, ndërsa forcat në terren po punojnë për krijimin e një perimetri parandalues, për të shmangur depërtimin e flakëve në kurorën e zonës së mbrojtur.
Aktualisht, rreth 40 forca zjarrfikëse dhe të tjera struktura ndihmëse janë të angazhuara në terren. Shërbimi i Bashkisë ka nisur punën me një skrep për të hapur rrugë që mundëson afrimin e mjeteve zjarrfikëse në sipërfaqen e prekur. Situata mbetet e vështirë, pasi zona ndodhet në kufi dhe ka shumë mina të pashpërthyera, ku herë pas here dëgjohen shpërthime. Kjo e bën të pamundur afrimin e drejtpërdrejtë të efektivëve në perimetrin e flakëve.
Mbrëmë ka mbërritur nga Tirana një grup xhenierësh, i cili sot po punon në vendngjarje për demontimin e disa minave të konstatuara në territor.
Njëkohësisht, autoritetet shqiptare janë në komunikim me palën greke për veprime të koordinuara në menaxhimin e situatës.
