Korçë – Skënderbeu U-19 vazhdon të shkruajë faqe dinjitoze në UEFA Youth League. Skuadra korçare barazoi 1–1 ndaj Aston Villa U-19 në stadiumin “Skënderbeu”, në ndeshjen e parë të raundit të dytë të kompeticionit evropian.
Të besuarit e trajnerit Edmir Osmanllari zhvilluan një ndeshje solide përballë një rivali me emër të madh në futbollin anglez, duke treguar karakter dhe organizim gjatë gjithë 90 minutave.
Aston Villa kaloi në avantazh në minutën e 37-të me golin e Wilson, por reagimi i korçarëve erdhi menjëherë. Vetëm tre minuta më pas, Ensar Beqiri shënoi golin e barazimit pas një aksioni të bukur të ndërtuar nga Oppong, duke ndezur entuziazmin në tribuna.
Në pjesën e dytë, të dyja skuadrat kërkuan golin e fitores, por portierët dhe mbrojtjet respektive u treguan në lartësinë e duhur, duke e mbyllur takimin me rezultatin e barabartë 1–1.
Ky rezultat lë të hapura të gjitha mundësitë për kualifikim, me ndeshjen e kthimit që do të luhet më 5 nëntor në Angli, ku Skënderbeu do të kërkojë të befasojë edhe një herë në arenën europiane.
Pas kalimit të suksesshëm të raundit të parë kundër Inter Escaldes, ky barazim përforcon imazhin e Skënderbeut si një ndër akademitë më premtuese të futbollit shqiptar, që tashmë po sfidon denjësisht emra të njohur të kontinentit.
