Skënderbeu do të zhvillojë të mërkurën, më 5 gusht, një ndeshje miqësore ndaj Kukësit, në aneksin e stadiumit “Skënderbeu”, me fillim nga ora 18:00. Takimi vjen në kuadër të fazës përgatitore të të dy skuadrave për sezonin e ri futbollistik.
Korçarët e drejtuar nga Ahmataj vijnë në këtë sfidë pas fitores 2-1 ndaj Besës në një tjetër test miqësor, ndërsa Kukësi i Bledi Kadiut siguroi suksesin 2-0 ndaj Ilirisë.
Një detaj interesant i kësaj përballjeje është prania e gjashtë futbollistëve korçarë në përbërjen e Kukësit. Lamellari, Mejdani, Dervishaj, Laze, Korçari dhe Zaçellari do të përballen me ekipin e qytetit të tyre, në një sfidë që pritet të shërbejë si një provë e rëndësishme për të dy klubet përpara nisjes së kampionatit.
