Prej disa vitesh, qyteti i Korçës është kthyer në një nga destinacionet më të preferuara turistike në Shqipëri, duke nxitur edhe rritjen e investimeve në sektorin e hotelerisë dhe bujtinave. Interesi për këtë sektor nuk ka ardhur vetëm nga biznesmenë vendas, por edhe nga korçarë që kanë vendosur të rikthehen nga emigracioni. Një prej tyre është Apostol Kosturi, i cili, pas rreth 18 vitesh emigracion në Itali, është rikthyer në Korçë për të ndërtuar biznesin e tij. Ai ka studiuar në Itali për menaxhim hotelerie dhe përvoja e fituar atje e ka ndihmuar të konkretizojë dëshirën për të investuar në vendlindje.
Pasioni i tij nuk ishte thjesht ndërtimi i një biznesi të ri, por rikthimi në jetë i një banese të vjetër karakteristike korçare. Së bashku me familjen, Kosturi ka blerë dhe restauruar shtëpinë e ish-priftit të njohur Josif Qirici, mik i Fan Nolit, një banesë me vlera historike dhe arkitekturore për qytetin. Shtëpia, e ndërtuar në vitin 1921, është rikthyer tashmë në një hapësirë mikpritëse për turistët që vizitojnë Korçën.
Edhe pse pjesën më të madhe të jetës e kaloi në Itali, lidhja me qytetin e lindjes mbeti e fortë për Kosturin. Rikthimi në Korçë dhe realizimi i investimit në një shtëpi tradicionale ishte për të një mënyrë për të përmbushur një ëndërr të hershme.
Gjatë viteve të fundit janë shtuar rastet e emigrantëve korçarë që janë rikthyer për të investuar në qytet, veçanërisht në sektorin e hotelerisë, turizmit dhe shërbimeve.
