Disa raste të ndryshme janë referuar në Prokurori nga strukturat e Drejtorisë Vendore të Policisë Korçë, duke përfshirë konflikte fizike, shkelje në tregtimin e pesticideve dhe një aksident rrugor me të plagosur.
Specialistët për Hetimin e Krimeve të Komisariatit të Policisë Maliq nisën procedim penal për veprën penale “Dëmtime të tjera me dashje” ndaj shtetasve A. Sh., 25 vjeç dhe J. K., 18 vjeçe, banues në fshatin Kamenicë. Sipas policisë, në fshatin Plasë të Maliqit ata dyshohet se janë konfliktuar fizikisht me një 45-vjeçar për motive të dobëta.
Ndërkohë, specialistët e Seksionit për Hetimin e Krimeve Ekonomike-Financiare referuan materialet në Prokurori për shtetasin R. Zh., 57 vjeç, banues në fshatin Tren, Devoll. Gjatë një kontrolli në rrugën e fshatit u gjet një automjet me drejtues shtetasin G. M., brenda të cilit kishte pesticide për pemtari pa fatura blerjeje. Nga verifikimet dyshohet se pesticidet ishin blerë në magazinën e 57-vjeçarit.
Po ashtu, specialistët e Policisë Rrugore nisën procedim penal për shtetasin F. I., 61 vjeç, banues në fshatin Qafëzez, Kolonjë. Ai dyshohet se në dalje të qytetit të Ersekës, duke drejtuar automjetin e tij, është përfshirë në një aksident me dy mjete të tjera. Si pasojë, tre pasagjerë u transportuan në spital dhe pas mjekimit janë larguar në banesë.
Në Korçë, policia referoi materialet në Prokurori edhe për shtetasen L. V., pasi dyshohet se në lagjen nr. 9 ka dëmtuar mobilie dhe orendi në një mobileri për motive të dobëta.
Ndërkohë është shpallur në kërkim shtetasja M. D., 40 vjeçe, banuese në Korçë, e dyshuar për veprën penale “Braktisja e fëmijëve të mitur”, ndërsa vijon puna për kapjen e saj.
Materialet procedurale iu referuan Prokurorisë së Korçës për veprime të mëtejshme.
Në një rast tjetër, më 13 mars 2026, në spitalin pediatrik të Korçës u paraqit në gjendje të rëndë shëndetësore një foshnjë 2-muajshe nga një fshat i Devollit. Sipas deklarimeve të familjarëve, foshnja kishte lindur para kohe dhe me probleme respiratore. Pas trajtimit fillestar në Korçë, ajo u transportua drejt Tiranës për mjekim më të specializuar.
