Drejtoria Vendore për Kufirin dhe Migracionin Korçë ka intensifikuar kontrollet për parandalimin dhe goditjen e paligjshmërive në kufi, si pjesë e masave të shtuara të sigurisë dhe luftës kundër veprimtarive të kundërligjshme.
Në vijim të kontrolleve sistematike dhe atyre të bazuara në informacionet policore të siguruara në rrugë operative, shërbimet e Stacionit të Policisë Kufitare Pustec, në afërsi të Qafës së Zvezdës, ushtruan kontroll në një automjet tip kamionçinë, me drejtues shtetasin K. D., 38 vjeç, banues në fshatin Cangonj, Devoll. Gjatë kontrollit, në pjesën e karrocerisë së mjetit u gjet një sasi dru zjarri pa dokumentacionin përkatës. Sasia e druve dhe automjeti u sekuestruan në cilësinë e provës materiale.
Gjithashtu, nga të njëjtat shërbime u ndalua një automjet tip furgon, me drejtues shtetasin S. Ll., 57 vjeç dhe pasagjer shtetasin K. M., 67 vjeç, banues në fshatin Orman, Pojan. Në karrocerinë e mjetit u gjet një gjedh (viç) i pamatrikulluar dhe pa dokumentacionin përkatës, i dyshuar si i kontrabanduar.
Në vijim të veprimeve procedurale, materialet u referuan në Prokurori, ku nisi procedimi penal për shtetasin K. D., për veprën penale “Prerja e paligjshme e pyjeve”, si dhe për shtetasit S. Ll. dhe K. M., për veprat penale “Kontrabanda me mallra të tjerë” dhe “Tregtimi dhe transportimi i mallrave që janë kontrabandë”.
Materialet iu referuan Prokurorisë së Korçës për veprime të mëtejshme.
