Zero raste të kultivimit të kanabisit në Pogradec gjatë 2025, prezantohet plan i ri masash për vitin 2026
Falë bashkëpunimit të ngushtë mes Policisë së Shtetit dhe pushtetit vendor, viti 2025 u mbyll pa asnjë rast të evidentuar të kultivimit të kanabisit në territorin e Bashkisë Pogradec. Ky rezultat u vlerësua si tregues i efektivitetit të koordinimit mes institucioneve dhe punës së vazhdueshme monitoruese në terren.
Në një takim të zhvilluar së fundmi, Kryekomisar Gentan Dedej dhe nën/prefekti Luan Maxhari prezantuan planin e masave për vitin 2026.
Gjatë takimit u kërkua thellimi i bashkëpunimit mes strukturave të policisë dhe kryepleqve të fshatrave, me fokus jo vetëm monitorimin e territorit, por edhe parandalimin e çdo tentative për kultivimin e bimëve narkotike.
Autoritetet theksuan se bashkëpunimi me komunitetin mbetet kyç për ruajtjen e këtij standardi edhe gjatë vitit të ardhshëm, me synimin për të garantuar siguri dhe rend në të gjithë territorin e Pogradecit.
