Ekipi i volejbollit për femra i KS Pogradeci ka shkruar historinë, duke siguruar për herë të parë kualifikimin në finalen e Kupës së Republikës.
“Liqenoret” vulosën suksesin pas fitores 0–3 në transfertë ndaj KS Dinamo Tirana, ndërsa triumfuan edhe në ndeshjen e kthimit me rezultatin bindës 3–0. Vajzat e drejtuara nga trajneri Besnik Lisha dominuan plotësisht takimin, duke fituar setet 25–18, 25–12 dhe 25–15.
Volejbollistet Anxhela Mehmeti dhe Kejda Kodra theksuan se skuadra e këtij sezoni është ndërtuar për të synuar trofe.
“Siç janë bërë pretendimet për ekipin, duam të fitojmë të gjitha kupat dhe kampionatin. Të dyja ekipet janë të forta, pse jo me Skënderbeun në finale?”, u shpreh Mehmeti.
Ndërsa Kodra deklaroi: “Fusha e ka treguar paraqitjen tonë, arritëm aty ku deshëm. Asgjë nuk ka mbaruar derisa të shpallemi kampionë të Kupës së Shqipërisë. Kushdo që të dalë në finale do të jetë kundërshtar i fortë, por ne do punojmë fort për të arritur objektivat.”
Në finalen e madhe, Pogradeci do të përballet me KS Tirana, në një sfidë që ka gjasa të zhvillohet në Pogradec. Për qytetin liqenor, kjo finale është historike, pasi për herë të parë skuadra e femrave luan një finale kaq të rëndësishme në volejboll.
