Drejtoria Vendore e Policisë Korçë bën me dije se specialistët e strukturave përkatëse kanë referuar materialet në Prokurori për dy raste të ndodhura në qytetin e Pogradecit.
Specialistët e Sektorit të Qarkullimit Rrugor kanë nisur procedim penal ndaj shtetasit Gj. Zh., 63 vjeç, banues në Pogradec, pasi në lagjen nr. 3, duke drejtuar automjetin, ka përplasur një 17-vjeçar. I mituri ndodhet në spital, nën kujdesin e mjekëve, dhe është jashtë rrezikut për jetën.
Ndërkohë, specialistët për Hetimin e Krimeve të Komisariatit të Policisë Pogradec kanë referuar materialet për shtetasin K. S., 53 vjeç, banues në fshatin Nicë, për veprën penale “Braktisja e kafshës së shoqërimit”. Dyshohet se qeni që ai mbante ka dalë nga rrethimi i banesës dhe ka sulmuar një shtetase, duke i shkaktuar dëmtime në krah. E dëmtuara po merr mjekim në spital dhe ndodhet jashtë rrezikut për jetën.
Materialet procedurale i janë referuar Prokurorisë së Korçës për veprime të mëtejshme.
