Autoritetet e Policisë së Korçës kanë zbardhur ngjarjen e ndodhur mbrëmjen e djeshme në një lokal në lagjen nr.1, ku mbetën të plagosur me mjet prerës (thikë) dy persona.
Si rezultat i hetimeve dhe veprimeve operative, u identifikuan dhe u arrestuan 10 shtetas, ndër të cilët Dritan Pino (D. P.), 54 vjeç, banues në Korçë, i dyshuar si autori kryesor i konfliktit. Ai akuzohet për veprat penale:
• “Vrasja me dashje, mbetur në tentativë”
• “Plagosja e rëndë me dashje”
• “Plagosja e lehtë me dashje”
• “Shkatërrimi i pronës”
• “Deklarimi i rremë para oficerëve të policisë gjyqësore”
• “Prishja e qetësisë publike”
• “Prodhimi, mbajtja, blerja apo shitja pa leje e armëve të ftohta”
Të tjerët e përfshirë në konflikt, të moshave dhe emrave të ndryshëm, janë proceduar për “Plagosje të rëndë dhe të lehtë me dashje”, “Shkatërrim prone”, “Deklarim të rremë” dhe “Prishje të qetësisë publike”.
Gjithashtu, është shpallur në kërkim E. K., 38 vjeç, banues në Korçë, i dyshuar për përfshirje në konflikt.
Ngjarja ka ndodhur gjatë një përleshjeje fizike mes shtetasve të përfshirë, ku janë përdorur edhe sende të forta, duke shkaktuar dëme materiale në lokal dhe duke prishur qetësinë publike. Gjatë veprimeve procedurale, disa prej të dyshuarve dhanë deklarata të rreme përpara punonjësve të Policisë.
Po ashtu, për veprime të mëtejshme u procedua në gjendje të lirë edhe pronari i lokalit, R. I., 45 vjeç, për veprën penale “Punësimi i paligjshëm”, pasi kishte punonjës të paregjistruar në organet kompetente.
Materialet procedurale janë referuar Prokurorisë së Korçës për veprime të mëtejshme.
