*Niko Peleshi: E ardhmja e UNIKO-s lidhet me teknologjinë dhe inovacionin*
*Peleshi: Një diplomë moderne duhet të shoqërohet me njohuritë e teknologjive të reja*
Drejtuesi politik i Qarkut Korçë, Niko Peleshi, ka përcjellë përmes një videoje të publikuar në rrjetet e tij sociale një mesazh për Universitetin “Fan S. Noli”, duke vlerësuar ecurinë e regjistrimeve në fazën e parë dhe duke nënvizuar nevojën për një hap të ri në zhvillimin e universitetit.
Peleshi thekson se rezultatet pozitive të regjistrimeve duhet të shoqërohen me vijimin e reformimit dhe modernizimit të kurrikulave, në mënyrë që programet e studimit t’u përgjigjen sa më mirë kërkesave të tregut të punës.
Një vëmendje e veçantë i kushtohet integrimit të teknologjive të reja dhe Inteligjencës Artificiale në arsimin universitar. Sipas Peleshit, AI po transformon me shpejtësi tregun e punës, shërbimet, sipërmarrjen dhe institucionet, duke e bërë të domosdoshme përgatitjen e brezit të ri për këtë realitet.
Ai nënvizon se Inteligjenca Artificiale nuk është më një fushë ekskluzive e shkencave ekzakte apo e programuesve, por një teknologji që mund të integrohet në çdo fushë studimi dhe profesion. Njohja dhe përdorimi i këtyre mjeteve, thekson Peleshi, mund t’u japë të rinjve një avantazh të rëndësishëm në tregun e punës.
“UNIKO ka vullnetin dhe duhet të gjejë guximin të ecë me hapin e kohës”, shprehet Peleshi, duke e konsideruar statusin e një universiteti rajonal jo si një kufizim, por si një mundësi për të lëvizur më shpejt drejt transformimit digjital.
Në mesazhin e tij, Peleshi vë në dukje edhe rrjetin e gjerë të partnerëve të Universitetit “Fan S. Noli” dhe mbështetjen e institucioneve për zhvillimin e tij.
Në fund, mesazhi i drejtohet edhe maturantëve që janë në procesin e zgjedhjes së universitetit, duke i ftuar të shohin UNIKO-n si një mundësi për të ndërtuar një të ardhme akademike dhe profesionale në përputhje me kërkesat e reja të tregut të punës.
