“Ilaçet me borxh” është realiteti i përditshëm për shumë pensionistë dhe familje në Korçë, të cilët nuk arrijnë të përballojnë koston e plotë të barnave. Në farmacitë e qytetit, fletoret ku shënohen borxhet janë kthyer në dëshminë më të qartë të vështirësive ekonomike me të cilat përballen qytetarët.
Farmacistët tregojnë se çdo ditë përballen me pacientë që, edhe pse kanë receta të përshkruara nga mjekët specialistë, nuk mund t’i blejnë të gjitha ilaçet për shkak të mungesës së të ardhurave. Në shumë raste, farmacitë e lagjeve u japin barnat me borxh, duke mbajtur lista të gjata me emrat e klientëve.
Edhe pensionistët pranojnë se pensionet nuk mjaftojnë për të përballuar shpenzimet bazë, ndërsa për shumë prej tyre mbështetja kryesore vjen nga fëmijët emigrantë. Ata shprehen se rritjet e pensioneve nuk kanë qenë të mjaftueshme për të përballuar rritjen e kostos së jetesës dhe të barnave.
Pavarësisht indeksimeve të herëpashershme të pensioneve, shumë të moshuar në Korçë vazhdojnë të përballen me zgjedhjen e vështirë mes ushqimit dhe ilaçeve. Fletoret e borxheve në farmacitë e lagjeve mbeten një tregues i qartë se për një pjesë të qytetarëve, kujdesi për shëndetin është bërë një barrë që pensioni mujor nuk e përballon dot.
