Në kuadër të takimeve të “Pranisë Besnike”, të urdhëruara nga kryeministri Edi Rama, deputetët e juglindjes janë përballur me një sërë shqetësimesh dhe kërkesash të banorëve, nga çështjet e pronësisë e pensionet, deri te rrugët, ndriçimi dhe furnizimi me ujë të pijshëm.
Një prej rasteve të ngritura është ai i një të moshuari, i cili prej 11 vitesh kërkon pensionin e plotë të minatorit. Ai thotë se ka punuar 14 vite nëntokë dhe, pavarësisht se ka fituar të drejtën përmes një vendimi gjykate, ende nuk përfiton pensionin që pretendon.
Në zonat rurale, shqetësimet kryesore vijojnë të lidhen me infrastrukturën. Banorët kërkojnë ndërhyrje në rrugë, ujësjellës dhe ndriçimin rrugor. Një prej tyre shprehet se problematika është e vjetër dhe kujton premtimet e bëra ndër vite, duke përmendur edhe ish-deputeten Blerina Gjylameti, ndërsa rruga drejt fshatit Senisht ende nuk është zgjidhur.
Mes shqetësimeve ka edhe banorë që shprehen optimistë për përmbushjen e kërkesave. Një i moshuar thotë se ka shpresë që punët e kërkuara të realizohen në masën 70-80%.
Takimet e deputetëve janë zhvilluar në Maliq, Korçë dhe Devoll, ku ndër kërkesat kryesore të fermerëve kanë qenë gjetja e tregjeve për shitjen e produkteve, mbështetja më e madhe për bujqësinë dhe përmirësimi i rrugëve që lidhin parcelat bujqësore.
Takimet pritet të vijojnë edhe në zona të tjera të qarkut, me synimin për të mbledhur nga afër problematikat dhe kërkesat e banorëve.
