Fermerët e juglindjes po orientohen gjithnjë e më shumë drejt përdorimit të plehruesve organikë dhe preparateve me bazë aminoacidesh, me synim përmirësimin e cilësisë së prodhimit, uljen e kostove dhe mbrojtjen e tokës e mjedisit.
Në Dvoran të Korçës, në një nga blloqet e mbjella me mollë, profesor Baki Dervishi shpjegon se përdorimi i preparateve me bazë aminoacidesh ka ndihmuar në trajtimin e një problemi fiziologjik të frutave, të njohur si “bitter pit”, i cili lidhet kryesisht me mungesën e kalciumit në mollë.
Pas analizave të gjetheve dhe identifikimit të niveleve të larta të azotit, u aplikua preparati NutriVivia Amino Plus në tri periudha, me intervale dhjetëditore. Sipas profesor Dervishit, trajtimi solli frenimin e problemit dhe përmirësimin e cilësisë së frutave.
Sot, blloku i mollëve karakterizohet nga prodhim i lartë, fruta të njëtrajtshme dhe me cilësi të mirë tregtare.
Edhe fermerët vlerësojnë rëndësinë e përdorimit të këtyre produkteve në bujqësi. Ferdinant Ali, fermer në Dvoran, thekson se plehruesit organikë dhe preparatet me bazë aminoacidesh duhet të përdoren më gjerësisht, pasi ndihmojnë në zhvillimin e bimëve, përmirësimin e cilësisë së prodhimit dhe, kur aplikohen sipas rekomandimeve, mund të kontribuojnë në uljen e kostove dhe rritjen e rendimentit.
Eksperienca në Dvoran tregon një orientim drejt praktikave bujqësore më të qëndrueshme, ku synohet të ruhet ekuilibri mes produktivitetit, cilësisë së frutave dhe mbrojtjes së mjedisit.
