Qindra kuintalë prodhime bujqësore kanë mbetur të pashitura nga fermerët e fushës së Maliqit. Misri, patatet, qepët dhe gruri – kultura bazë për këtë zonë – po grumbullohen në magazina, ndërsa kërkesa në treg është minimale.
Skënder Hamzaj, një nga fermerët potencialë të fshatit Drithas, tregon se situata këtë vit është tepër e vështirë. Ai thotë se ka mbi 500 kuintalë misër të pashitur, ndërsa stok ka edhe për grurin.
“S’ka kërkesë tregu. Vit i vështirë këtë vit. Ndoshta është ulur edhe numri i krerëve të bagëtive, ndërsa moti ndikon shumë, vetëm dëbora e rrit kërkesën. Nuk kemi asnjë mundësi. Gruri nuk diskutohet fare, e marrin vetëm mullinjtë dhe çmimi nuk ia vlen.”
Edhe Robert Qeleshi, fermer nga fshati Zvirinë i bashkisë Maliq, përballet me të njëjtin problem, duke pasur sasi të mëdha prodhimi të pashitur, kryesisht qepë.
“Kjo varet nga tregu. Tregtarët e vegjël që vijnë me furgonë vijnë rrallë. Flitet se tregu është i mbushur, por çmimi është 20 lekë të vjetra për qepën. Nuk ka tërheqje dhe prodhimi po prishet. Sipërfaqet nuk janë shtuar, pasi shumica kanë emigruar prej vitesh. Mbase vjen mall nga jashtë dhe ndaj nuk shitet prodhimi vendas, edhe pse cilësia është shumë e mirë.”
Nga ana tjetër, përgjegjësi i sektorit të bujqësisë në Bashkinë Maliq, Aurel Zenunllari, pranon se një pjesë e konsiderueshme e prodhimeve kanë mbetur pa u shitur, por thekson se është e vështirë të përcaktohet shkaku i saktë.
“Kemi një problem me shitjen e produkteve këtë sezon. Kërkesat kanë qenë më të ulëta krahasuar me vitet e kaluara dhe çmimi nuk ka qenë i favorshëm. Fermerët janë të interesuar ta shesin prodhimin, cilësia nuk mungon, por çmimi po sjell vështirësi në shitje.”
Sipas të dhënave, vetëm në fushën e Maliqit janë të kultivuara rreth 4000 hektarë misër, 600 hektarë patate dhe 650 hektarë qepë, ndërsa fermerët kërkojnë ndërhyrje dhe politika mbështetëse për të shmangur humbjet e mëdha ekonomike.
