Vijojnë kontrollet në të gjithë territorin e qarkut Korçë për evidentimin dhe goditjen e veprimtarisë së paligjshme të lojërave të fatit. Si rezultat, Policia ka goditur edhe 2 raste të tjera të kësaj veprimtarie, duke vënë në pranga 1 shtetas dhe proceduar penalisht 2 të tjerë.
Në zbatim të Planit të Masave për kontrollin e ambienteve dhe personave që ushtrojnë veprimtari të jashtëligjshme të organizimit të lojërave të fatit, si dhe në kuadër të operacionit policor “Loja e fundit”, shërbimet e Komisariatit të Policisë Korçë, mbi bazën e informacioneve të siguruara në rrugë operative, kanë ushtruar kontrolle në disa lagje të qytetit.
Si rezultat i kontrolleve, specialistët për Hetimin e Krimeve arrestuan në flagrancë shtetasin M. P., 43 vjeç, banues në Korçë, për veprat penale:
- “Organizimi ose ushtrimi i veprimtarive të lojërave të fatit në kundërshtim me ligjin”;
- “Vënia në dispozicion e lokaleve për lojëra të palejuara”.
Gjithashtu, materialet procedurale iu referuan Prokurorisë së Korçës, ku nisi procedimi penal për shtetasit G. A. dhe Gj. M., banues në Korçë.
Gjatë kontrollit të ushtruar në lokalin në pronësi të 43-vjeçarit, në lagjen nr. 8 të qytetit, në celularët e shtetasve M. P. dhe G. A. u konstatuan faqe aktive për baste sportive. Po ashtu, gjatë kontrollit të celularit të shtetasit Gj. M., në një lokal në lagjen nr. 9, u gjetën faqe për baste sportive.
Në cilësinë e provës materiale u sekuestruan 3 aparate celularë.
Materialet procedurale iu referuan Prokurorisë së Korçës për veprime të mëtejshme.
