Bashkia e Maliqit ka çelur zyrtarisht sezonin turistik veror në pyllin e Fazaneve, një prej destinacioneve më të frekuentuara nga turistët vendas dhe të huaj në juglindje të vendit.
Në ceremoninë hapëse, u vu theksi te potenciali i madh turistik që ofron kjo bashki, nga fshatrat e fushës deri te zonat malore, të cilat vitet e fundit kanë tërhequr gjithnjë e më shumë vizitorë. Regjisori Ilir Koro vlerësoi pasuritë natyrore, traditat dhe kulinarinë e zonës, ndërsa nënvizoi nevojën për më shumë investime në shtigjet turistike dhe guidat orientuese për vizitorët.
Pylli i Fazaneve mbetet një nga pikat më të vizituara gjatë sezonit, ku sipas përgjegjësit të parkut, Niko Demollari, fluksi i turistëve është rritur ndjeshëm, sidomos gjatë kësaj periudhe.
Nga ana tjetër, kryetari i Bashkisë Maliq, Gëzim Topçiu, theksoi se krahas zhvillimit të bujqësisë dhe blegtorisë, vitet e fundit një prioritet i rëndësishëm është bërë edhe zhvillimi i turizmit, veçanërisht në zonat malore si Gorë dhe Moglicë.
Me shtrirjen më të madhe gjeografike në juglindje dhe me resurse të pasura natyrore, Bashkia e Maliqit synon ta kthejë turizmin në një tjetër motor zhvillimi ekonomik për zonën.
