Kristi Konica është një nga ata të rinj që nuk e harrojnë kurrë rrënjën dhe e shndërrojnë pasionin në mision. Udhëtimi i tij artistik nisi në vitin 2010, kur për herë të parë preku klarinetën, nën kujdesin e ustallarëve të vjetër të Leskovikut. Me një pasion të lindur për muzikën popullore dhe një ndjenjë të thellë për qytetin e tij të vogël, Kristi përfundoi kursin e klarinetës në vitin 2014, duke vendosur që një ditë t’i rikthehej vendlindjes për të dhënë kontributin e tij.
Por Leskoviku i atyre viteve nuk ofronte asnjë mundësi pune. Kështu, Kristi u largua drejt Tiranës, me ëndrrën në zemër dhe klarinetën në shpirt. Edhe pse larg, pushimet verore i shfrytëzonte për të organizuar aktivitete kulturore në qytetin që e rriti. Pas katër vitesh, i erdhi mundësia që kishte ëndërruar gjithmonë – të rikthehej dhe të kontribuonte në Leskovik. Me ndihmën e z. Erion Isai, të cilin e falënderon me mirënjohje të veçantë, Kristi mori vendimin e kthimit pa u menduar dy herë. “Mund të ikja jashtë, por pasioni për të bërë diçka për vendin tënd është më i fortë se çdo gjë,” – thotë ai.
Sot, Kristi Konica ka rigjallëruar grupin e sazeve të Leskovikut, një formacion që mungonte prej më shumë se 15 vitesh. Në Festivalin Kombëtar të Sazeve, grupi që ai krijoi fitoi plot dy çmime, duke rikthyer jo vetëm muzikën, por edhe krenarinë e qytetit të tij. Për herë të parë pas më shumë se një dekade, në muajin gusht – një muaj simbol i festave në Leskovik – qyteti dëgjoi sërish tingujt e klarinetës, këngët e vjetra dhe ritmet e traditës.
Kristi Konica nuk është thjesht një klarinetist. Ai është një model i të rinjve që nuk harrojnë nga vijnë dhe që besojnë se arti dhe pasioni mund të ndryshojnë një qytet të tërë.
