Qarku i Korçës është përfshirë në disa ngjarje gjatë 24 orëve të fundit, ku policia ka nisur procedime penale për aksidente rrugore dhe raste dhune.
Në aksin rrugor “Pogradec–Qafë Thanë”, pranë fshatit Lin, një 48-vjeçare nga Egjipti, duke drejtuar një kamion, dyshohet se ka humbur kontrollin e mjetit dhe ka dalë nga rruga. Si pasojë, u dëmtua pasagjeri 35-vjeçar nga Cërriku, i cili ndodhet në spital jashtë rrezikut për jetën.
Një tjetër aksident u regjistrua në segmentin “Hoçisht–Gracë”, ku një 22-vjeçar nga Hoçishti humbi kontrollin e automjetit, duke dalë nga rruga. Pas aksidentit, makina mori flakë, ndërsa drejtuesi dhe dy pasagjerët pësuan lëndime të lehta. Pas ndihmës mjekësore, ata u larguan në banesë.
Ndërkohë, në Korçë, policia nisi procedim penal ndaj një 40-vjeçari, i cili dyshohet se goditi me grusht një bashkëmoshatar pas një konflikti për motive të dobëta.
Po ashtu, dy shtetas të tjerë, 37 dhe 29 vjeç, u proceduan pasi dyshohet se dhunuan një 21-vjeçar gjatë një konflikti në ambientet e një lokali.
Një 37-vjeçar tjetër në Korçë po hetohet pasi akuzohet se ka kanosur një 40-vjeçar.
Në Pogradec, katër persona u shoqëruan në Komisariat pas një konflikti të ndodhur mbrëmjen e djeshme në lagjen nr. 1. Policia ka referuar materialet në Prokurori për vlerësim dhe vijimin e hetimeve.
