Një 72-vjeçar ka humbur jetën pasditen e kësaj të shtune si pasojë e asfiksisë, pasi i vuri flakën banesës së tij në lagjen nr. 15 të qytetit të Korçës.
Viktima është identifikuar si Urim Hysolli. Sipas burimeve, rreth orës 15:40, në prani të dy qiramarrësve që jetonin në apartament, ai ka spërkatur me benzinë orenditë e banesës dhe më pas u ka vënë flakën. Dy qiramarrësit kanë arritur të dalin menjëherë jashtë, ndërsa 72-vjeçari ka mbetur brenda, ku ka humbur jetën nga asfiksia.
Mësohet se apartamenti ishte dhënë me qira prej vitesh dy të moshuarve të tjerë. Rreth dy muaj më parë, Hysolli ishte rikthyer për të jetuar në banesë, duke qëndruar në njërën prej dhomave, ndërsa qiramarrësit vijonin të banonin në ambientet e tjera.
Sipas banorëve të zonës, ai u kishte kërkuar qiramarrësve të largoheshin, pasi dëshironte të jetonte i vetëm. Fqinjët pohojnë gjithashtu se 72-vjeçari konsumonte shpesh alkool dhe se disa ditë më parë kishte tentuar të ndizte zjarr në banesë.
Në vendngjarje mbërritën menjëherë shërbimet zjarrfikëse dhe policia, të cilat bënë të mundur shuarjen e flakëve dhe parandalimin e përhapjes së zjarrit në apartamentet e tjera të pallatit.
Grupi hetimor po vijon punën për të zbardhur plotësisht rrethanat e ngjarjes.
