Korça pasurohet me një tjetër hapësirë kushtuar trashëgimisë kulturore, këtë herë me fokus etnografinë dhe kostumografinë tradicionale të juglindjes së vendit. Kostumografja e njohur korçare Lirika Pojani ka sjellë para publikut një koleksion të veçantë kostumesh tradicionale, të ekspozuara në një galeri arti në Pazarin e Vjetër të Korçës.
Ekspozita përmbledh punime të realizuara ndër vite nga Pojani dhe synon t’u prezantojë vizitorëve historinë, kulturën dhe traditat e zonave të ndryshme të juglindjes shqiptare. E vendosur në një nga pikat më të frekuentuara të qytetit, galeria pritet të vizitohet nga turistë vendas dhe të huaj gjatë gjithë vitit.
Sipas kostumografes, ekspozita është organizuar në tre pavijone të veçanta, të ndara sipas zonave dhe periudhave historike. Ajo nis me kostumet rurale, vijon me veshjet karakteristike të komuniteteve të ndryshme dhe përfundon me kostumet qytetare korçare, që pasqyrojnë traditën dhe elegancën e jetës së dikurshme në qytet.
Përfaqësuesja e Shoqatës së Artizanëve të Shqipërisë, Jetona Myteveli, vlerësoi punën e Lirika Pojanit, duke theksuar se ajo ka arritur të lidhë artizanatin me turizmin dhe promovimin e trashëgimisë kulturore përmes një galerie kreative dhe bashkëkohore.
Ndërkohë, Bashkia e Korçës, në bashkëpunim me artizanët vendas, po punon për zgjerimin e aktiviteteve dhe produkteve artizanale në Pazarin e Vjetër. Synimi është që këto hapësira të bëhen pjesë e pandashme e ofertës turistike të qytetit dhe të kontribuojnë në ruajtjen dhe promovimin e identitetit kulturor të rajonit.
