Është çelur sezoni i hipizmit në Shqipëri me një garë të zhvilluar në qytetin e Korçë, ku morën pjesë mbi 30 garues nga trevat shqiptare, përfshirë Tiranë dhe Kosovën. Në aktivitet u përfshinë fëmijë dhe të rritur, duke reflektuar rritjen e interesit për këtë sport në vend.
Vitet e fundit, hipizmi ka njohur zhvillim të ndjeshëm, falë investimeve në pista, organizimit të aktiviteteve dhe promovimit nga Federata e Hipizmit e Shqipërisë. Sipas organizatorëve dhe pjesëmarrësve, nga gara në garë vihet re rritje e numrit të kalorësve dhe interes më i madh nga të rinjtë.
“Gara e sotme shënon çeljen e sezonit të hipizmit. Kemi pjesëmarrës nga Kosova, Tirana dhe Korça. Janë 30 kalorës, fëmijë dhe të rritur, me eksperienca të ndryshme. Ky sport po zhvillohet gjithnjë e më shumë, me organizime të reja dhe pjesëmarrës të rinj. Ka edhe turistë që vijnë, pasi në Shqipëri është më lirë se jashtë dhe zgjedhin të mësojnë kalërimin këtu,” – u shpreh një nga organizatorët.
Ndër pjesëmarrësit ishte edhe 10-vjeçarja Junia Kavazi nga Korça, e cila tregoi pasionin për këtë sport: “Kam një vit e gjysmë që merrem me kuaj. E kam hobi dhe kur të rritem dua të bëhem kalorëse.”
Një tjetër garuese nga Tirana, që jeton në Angli, theksoi se vjen shpesh në Shqipëri për stërvitje: “Kam sjellë edhe kalin tim. Kam gjetur mikpritje shumë të mirë. Vij nëpër Europë për mësime dhe këtu ndihemi shumë të kënaqur. Synojmë të arrijmë më lart.”
Përveçse si sport, hipizmi po shihet gjithnjë e më shumë edhe si një mundësi për zhvillimin e turizmit në juglindje të vendit, duke tërhequr vizitorë vendas dhe të huaj që duan të përjetojnë kalërimin në natyrë.
