Faleminderit “HerMessi” pogradecar
Mbyllet një cikël, por mbetet një epokë!
Në një qytet që jeton me ndjesinë e fushës dhe dashurinë për topin, largimi i Hermes Shkulakut nga KF Pogradeci nuk është thjesht një lëvizje sportive, është fund i një epoke. Një kapitull i gjatë 11-vjeçar që u shkrua me djersë, buzëqeshje, spektakël dhe një dashuri të pakushtëzuar për fanellën liqenore.
Nuk ishte i gjatë në shtat, por ishte gjigand në shpirt dhe lojë, ishte ai që e kuptonte futbollin me intuitën e lindur, që i nxirrte mbrojtësit nga mendtë dhe i vinte sulmuesit në rolin më të lehtë në botë: “Ku e do topin të bësh gol?”. Ishte lojtari që nuk kërkonte skena, por skena e kërkonte atë.
Në Pogradec, të gjithë e thërrasin “Meku”, por për ata që e panë në fushë, ai ishte “HerMessi” – një shkrirje ideale e teknikës, përulësisë dhe vizionit që pak emra lokalë e kanë pasur pas viteve 90′.
Hermesi nuk do të jetë më në fushë nga shtatori, por buzëqeshja e tij mbetet ikonike, një emblemë e atij futbolli që e pa si të sinqertë, paqësor dhe të mençur. Ai ishte spektakël, ishte i dashur, por kurrë mendjemadh. Ishte model për të rinjtë, por edhe mik për të vjetrit.
Me batutën gati dhe “talljen” me topin ai zhvilloi karrierën jo vetëm si futbollist, por më shumë si djalë i qytetit, biri i atyre tribunave që e rritën dhe e brohoritën.
/@Redi Dandallaku/
