Më shumë se 30 familje që jetojnë në banesat sociale të ish-konviktit në Korçë përballen çdo ditë me kushte të rënda jetese, mes lagështirës, amortizimit dhe mungesës së investimeve.
Pamjet nga godina tregojnë degradimin e ambienteve, ku mungojnë kushtet minimale për një jetesë dinjitoze. Banorët, pjesa më e madhe familje në nevojë nga komuniteti rom dhe jo vetëm, shprehen se prej vitesh kanë marrë vetëm premtime nga institucionet vendore, ndërsa investimet kanë munguar.
Sipas tyre, problematikat janë të shumta, duke nisur nga rrjedhjet e ujit dhe lagështira në banja, mungesa e ndriçimit, amortizimi i dyerve dhe ambienteve të përbashkëta, deri te rreziku për shëndetin e fëmijëve dhe të moshuarve.
“Jetojmë mes mikrobeve dhe sëmundjeve. Kanë ardhur vetëm për të premtuar, por asgjë nuk është bërë”, shprehen banorët.
Të tjerë tregojnë se jetojnë me familjarët në dhoma të vogla dhe në kushte tepër të vështira ekonomike, ndërsa ankohen se askush nuk është kujdesur realisht për rehabilitimin e godinës.
Kërkesa e banorëve ndaj Bashkia Korçë mbetet e njëjtë prej vitesh: investime në banesat sociale dhe krijimi i kushteve minimale për një jetesë normale.
