Një konflikt disa-vjeçar mes fqinjësh ka shpërthyer sërish në një nga zonat më të frekuentuara turistike të juglindjes, duke vënë në qendër të vëmendjes një ndërtim të familjes Deli, i cili u cilësua së fundmi si “ndërtim pa leje” nga Inspektorati i Mbrojtjes së Territorit (IKMT).
Familja Deli, prej afro 20 vitesh aktive me një bujtinë dhe tavernë në qendër të Dardhës, pretendon se po përballet me një fushatë të organizuar presioni dhe prapaskenash për ta detyruar të pranojë kalim rruge në pronën e tyre, një pretendim që ata e quajnë të padrejtë dhe të paprovuar.
Sipas bashkëpronarëve Ornela dhe Ilir Deli, konflikti nisi në vitin 2018, kur fqinjët e tyre, Vangjush dhe Ilia Dishnica, kërkuan që të krijonin një rrugë kalimi përmes pronës së familjes Deli, pavarësisht se disponojnë dalje të drejtpërdrejtë në rrugën kryesore me një gjerësi prej 17 metrash, një fakt i konfirmuar nga vetë dokumentacioni i ASHK-së Korçë.
Në vitin 2019 dhe 2021, familja Deli ka marrë dy leje ndërtimi nga Bashkia Korçë një për ndërtimin e një muri ndarës dhe një tjetër për zgjerimin e oborrit të biznesit të tyre. Leja e parë është ankimuar dhe është rrëzuar me vendim gjykate, ndërsa për të dytën ata pretendojnë se ndërtimi është kryer brenda afatit dhe duke shlyer të gjitha detyrimet ligjore.
Inspektorati Kombëtar i Mbrojtjes së Territorit (IKMT), në disa inspektime të mëparshme nën drejtues të ndryshëm, e ka konsideruar të mbyllur këtë çështje, pa konstatuar shkelje. Por në kontrollin më të fundit, nën drejtimin e ri të zonjës Dallendyshe Bici, të përmendur si njohje e familjes Dishnica, ndërtimi është klasifikuar papritur si “ndërtim pa leje”.
“Po na presin oborrin, na gjobisin, vetëm për të na dëmtuar dhe për të kënaqur ego personale. Janë të vetëdijshëm që rruga që kërkojnë nuk ekziston realisht. Kjo nuk është drejtësi, por ndëshkim i qëllimshëm ndaj një biznesi që ka kontribuar për turizmin në Dardhë prej gati dy dekadash,” shprehet zonja Ornela Deli për mediat.
Rasti është një shembull tipik sesi konfliktet e vogla të pronësisë mund të përshkallëzohen përmes ndërhyrjeve dhe ndikimeve në institucione, duke minuar jo vetëm të drejtat e pronarëve, por dhe besimin e qytetarëve tek drejtësia dhe administrata.
