Korça dhe rrethinat e saj, ende pa u çelur zyrtarisht sezoni turistik, po përjetojnë një boom vizitorësh të huaj, kryesisht nga vendet e Europës.
Në rrugët e qytetit është kthyer tashmë në një pamje të zakonshme prania e grupeve të shumta të turistëve, të cilët shprehen të mahnitur nga natyra, historia dhe kultura e juglindjes shqiptare.
Turistët francezë që kanë vizituar Korçën tregojnë se qyteti i ka surprizuar pozitivisht.
“Qëndruam një ditë në Korçë. Jemi nga Franca. Na pëlqeu shumë. Natyra e mrekullueshme”, shprehet një prej tyre.
“Është hera e parë në Shqipëri. Korça të mahnit me arkeologjinë dhe bukuritë e saj”, thotë një tjetër turist.
Ndërsa një vizitore tjetër shton: “Peizazhi është mahnitës. Nuk mendonim se do kënaqeshim kaq shumë. Po largohemi me vlerësime maksimale dhe shpresojmë që turizmi këtu të rritet sepse ka shumë potencial.”
Edhe guidat turistike shqiptare konfirmojnë interesin në rritje të të huajve për juglindjen, sidomos nga turistët francezë, të cilët e cilësojnë Korçën si “Parisi i Vogël”.
“Janë të gjithë francezë dhe po bëjnë një tur njëjavor në Shqipëri. Korça quhet ‘Parisi i Vogël’ dhe vizitorët mbeten shumë të kënaqur, sidomos nga arkitektura dhe varrezat e ushtarëve francezë”, tregon guida turistike.
Sipas të dhënave, vetëm vitin e kaluar juglindja e vendit mirëpriti mbi 700 mijë vizitorë, ndërsa pritshmëritë për këtë sezon janë edhe më të larta.
