Fermerët e fushës së Maliqit po përballen edhe këtë vit me çmime të ulëta të grurit, të cilat sipas tyre nuk mbulojnë as kostot e prodhimit. Aktualisht gruri tregtohet me 26-27 lekë për kilogram, ndërsa shpenzimet për farën, plehrat kimike, naftën, korrjen dhe transportin e bëjnë këtë kulturë bujqësore jo fitimprurëse.
Situata është edhe më e vështirë për fermerët që nuk disponojnë magazina për ruajtjen e prodhimit, pasi detyrohen ta shesin menjëherë me çmimin aktual. Ata shprehen se mungesa e tregut dhe kostot e larta po i çojnë drejt humbjeve.
“Me 27 lekë nuk ka leverdi. Korrja dhe transporti janë të shtrenjta, nuk ka fitim”, shprehet një fermer, ndërsa një tjetër thekson se edhe pas një sezoni të tërë pune “nuk marrim dot djersën tonë”.
Përgjegjësi i sektorit të bujqësisë në Bashkinë Maliq, Aurel Zenunllari, pranon se çmimi aktual nuk është i favorshëm, sidomos për fermerët që punojnë toka me qira.
Sipas tij, me një çmim prej 27-28 lekësh për kilogram, në shumë raste nuk mbulohen as kostot e prodhimit, ndërsa fermerët e zonave të prekura nga përmbytjet apo breshëri rezultojnë të jenë nën kosto.
Rënia e interesit për kultivimin e grurit reflektohet edhe në sipërfaqet e mbjella. Nëse në vitin 2025 në fushën e Maliqit u mbollën rreth 4,100 hektarë me grurë, këtë vit sipërfaqja është reduktuar me rreth 300 hektarë. Fermerët e lidhin këtë ulje me mungesën e tregut dhe çmimet e ulëta të produktit.
