Nga Xhensil Shkëmbi
Tre ditë më parë, katër punonjës policie në pikën kufitare të Kapshticës u arrestuan publikisht nga Agjencia e Mbikëqyrjes Policore (AMP). Mes tyre, figura me dekada shërbim të ndershëm në strukturat e shtetit. U akuzuan për shpërdorim detyre, vetëm pse vunë një vulë në një pasaportë, një procedurë rutinë, që çdo punonjës kufiri kryen për mijëra qytetarë çdo muaj.
Sot, gjykata foli. Arrestimi ishte i paligjshëm. Katër policët u liruan. Dhe ndërsa ata dalin sot nga masa ekstreme e arrestit, një dëm tjetër nuk kthehet më mbrapsht: fytyrat e tyre u ekspozuan si fajtorë, nderi i tyre u vendos në dyshim, dhe një sistem i tërë u trondit nga një veprim i nxituar, që sot e ka emrin zyrtar “gabim i AMP-së”.
Në vend që të mbështesë dhe motivojë efektivët e ndershëm, AMP zgjodhi spektaklin. Zgjodhi të shfaqet si “efikase”, edhe në mungesë të provave. Dhe sërish, një precedent u vendos: një arrestim pa bazë, një “turp publik” për ata që thjesht kryen detyrën.
Çfarë mesazhi jepet sot për policët që qëndrojnë për orë të tëra në postblloqe, nën shi, nën diell, në kufi apo në rrugë? Që një gabim procedural, një veprim teknik, një pasaportë e vulosur mund t’i çojë në pranga? A do të kenë më besim në sistem? A do të guxojnë më të marrin vendime, apo do të bëhen burokratë që kanë frikë të veprojnë?
E gjithë kjo, ndërkohë që autori i vetëm i trafikimit, drejtuesi i mjetit me drogë dhe municion, është ende në burg – i kapur falë një procedure që u krye pikërisht nga këta policë që sot u liruan. Absurd?
Dhe përtej rastit konkret, ngrihet një shqetësim i thellë: a po kthehet AMP nga agjenci kontrolli në agjenci frike? Vetëm në vitet e fundit, mbi 60 efektivë policie janë proceduar dhe më pas shpallur të pafajshëm. Çfarë ndodh me jetët, reputacionin dhe familjet e tyre ndërkohë që sistemi “eksperimenton”?
Nuk mund të ketë drejtësi me sy të mbyllur. Nuk mund të ketë reforma duke sakrifikuar njerëz të ndershëm. Nuk mund të luftosh krimin, duke e demoralizuar policinë.
Sepse sot, katër policë u liruan. Por nesër, sa të tjerë do kenë frikë të bëjnë punën nga frika se do të bëhen “kokë turku”?
Dhe më e rëndësishmja: kush mban përgjegjësi për një arrestim të paligjshëm? Apo edhe kjo histori do të harrohet, si të tjerat më parë?
