Historiani dhe studiuesi i trashëgimisë kulturore, Auron Tare ka thumbuar autoritetet e larta të shtetit shqiptar për lënien në harresë të shtëpisë së intelektualit, shkrimtarit dhe shqiptarit të madh Faik Bej Konica, ndërkohë që gjen kohën të restaurojë Konusllatën Greke.
Ai merr indicie nga ceremonia që është zhvilluar këtë të hënë në qytetin juglindor të Korçës, ku përfaqësues të lartë të shtetit, deputetë dhe përfaqësues të pushtetit lokal e njerëz të fesë, kanë marrë pjesë në ceremoninë e restaurimit të shtëpisë së Konsullit Jorgos Seferis.
Studiuesi i njohur ndan pamje nga ngjarja e veçantë në Korçë, ndërsa bën një paralelizëm me shtëpinë e Faik Konicës në fshatin Konicë, e cila është rrënuar në pjesën më të madhe të saj dhe bimësia e papastruar ka nisur të mbulojë muret.
“Godina ku ka sherbyer Poeti i madh Grek, Seferis si Konsull i Pergjithshem ne Korce. Autoritetet e larta shqiptare duke përuruar restaurimin e Godinës dhe hapjen e Konsullatës Greke në Korcë.
Më poshtë. Shtëpia e diplomatit shkrimtarit dhe shqiptarit të madh Faik Bej Konica për të cilën nuk ka asnjë përpjekje nga Shteti Shqiptar për ta restauruar në kujtim të Faik dhe Mehmet Beut një tjetër diplomat i madh shqiptar që punoi për interesin e Shqipërisë”, shkruan Auron Tare.
Konsullata Greke në Korçë është inauguruar zyrtarisht këtë të hënë, pasi ju nënshtrua një procesi restaurimi, ndërsa në ceremoni morën pjesë ministri i Jashtëm i Shqipërisë, Igli Hasani dhe homologu i tij grek, George Gerapetritis.
